«ЭНЭ МИНИИ АЛТАН ТООНТО, ЭНЭ МИНИИ ТҮРЭЛ НЮТАГ»

гэhэн Оёорой hургуулиин Банзаракцаева Юлиин найруулгаhаа Хүбшын сэрэг мододые Хилэ болгон жагсааhан, Тоонто Оёоройм хэрэмни- Даша Балбар баабай юм. (Г.Раднаева) Хүн бүхэн өөрын түрэhэн тоонто нютагтай . Минии тоонто Оёор нютаг юм. Түрэhэн гараhан газар нютагни өөрын эжы абадал адли , эльгэ зүрхэндэм юунhээшье дүтэ, хайратай, эгээл hайханаар үзэгдэдэг. Хуби заяанай табисуураар энэ нютагта минии элинсэг хулинсагууд түрөө, эхэ эсэгэмни мүндэлөө, үдөө. Би энэ болотороо түрэhэн газарайнгаа шарай мэдэрээб, Зэдэ гэжэ голдоо шунгажа, сэнгэжэ, наадажа, үльмы дээрээ үндыжэ, ехэ болооб. Yглөөгүүр эртэлэн бодоод, газаашаа гарахадам, яагаа hайхан бэ! Хабарай наранhаа гараараа hарабшалан, оршон тойрониие харахадаш, хэды гоёб даа, эхэ нютагни… Зүлгэ ногоогоор хушагдаhан түхэреэн талаяа, хүхэ номин огторгойе, жабхаланта Даша Балбарай оройе, тээ урдуур харуулшан мэтэ хүхэрэн байгша Гэдээн баабайе, томо шулуугаар бархайhан Yхэр Шулуун уулаяа адаглаhанай hүүлдэ, Алтан Уула баабайдаа харасаа шэглүүлхэш. Минии тоонто нютаг дэлхэйн үзэсхэлэнтэ гоё нютагуудай нэгэн гэжэ ходо тоологшоб. Аянай харгыда ябаашье hаа, холо хари нютагуудташье байгаа hаа, хэдышье хүшэр байдалай тохёолдоошье hаа, түрэл нютагаа оройдоо мартахагүйб. Бурхан шэнгеэр тахижа, эхэ эсэгэ шэнгеэр үргэжэ, түрүүшын сэбэрхэн дуран шэнгеэр hанажа ябахаб хододоо. Сэнхир ногоон дэлхэй дээрэ түрэл нютагайм тала дайда зундаа сэсэгүүдээрээ hалбаржа, алтан намарай үедэ шара набшаhаяа дэлгээн намжааржа, хүйтэн үбэлэй үедэ пүмпэгэр сагаан саhаар хушагдажа байг лэ! Саашадаа минии тоонто нютаг улам ехээр хүгжэжэ, арад зомнай үндэр наhанай орьёл өөдэ үгсэн урагшаа дабшажа, алхам бүридөө аза талаантай, ажал хэрэгынь урагшатай, элүүр энхэ, hайн hайхан байхыень хүсэнэб! Материал бэлдэгшэ Цырен-Ханда Доржиева мүн, Оёорой дунда hургуулиин буряад хэлэнэй багша.